Exo 24 | NdeIBE | STEP | Ngakho uNkulunkulu wasesithi kuMosi, “Woza kuJehova, wena lo-Aroni, uNadabi lo-Abhihu, kanye labadala bako-Israyeli abangamatshumi ayisikhombisa. Lizakhonza libucwala,

Exodus 24

Ukumiswa kwesivumelwano

1 Ngakho uNkulunkulu wasesithi kuMosi, “Woza kuJehova, wena lo-Aroni, uNadabi lo-Abhihu, kanye labadala bako-Israyeli abangamatshumi ayisikhombisa. Lizakhonza libucwala,

2 kodwa uMosi yedwa zwi uzasondela kuJehova; abanye kabafanelanga ukusondela eduze. Kantike abantu kabafanelanga ukuza laye.”

3 Kwathi uMosi esebuyele ebantwini wabatshela wonke amazwi kanye lemilayo kaJehova, abantu bakwamukela bavungama ngelizwi linye bathi, “Konke okutshiwo nguNkulunkulu sizakwenza.”

4 Ngokunjalo uMosi waloba konke uJehova ayekutshilo. Ngokusa okulandelayo uMosi wavuka kusesele wakha i-alithare ewatheni lentaba wamisa khona izinsika zamatshe alitshumi lambili emele izizwe ezilitshumi lambili zako-Israyeli. 5 Ngokunjalo wathuma amajaha ako-Israyeli ahamba ayatshisa umhlatshelo njalo banikela ngezinkunzi ezincane kungumnikelo wobudlelwano kuNkulunkulu. 6 UMosi wasethatha ingxenye yegazi walithela emiganwini eyayiyingubhe elinye wachela ngalo phezu kwe-alithare.

7 Ngakho wathatha incwadi yesivumelwano wayifundela abantu. Bona bavuma besithi, “Sizakwenza konke okutshiwo nguJehova; sizamlalela.”

8 Ngemva kwalokho uMosi wathatha igazi wachela ngalo abantu esithi kubo, “Leli ligazi lesivumelwano sikaJehova asenze lani maqondana lawo wonke lamazwi.”

9 UMosi lo-Aroni, loNadabi lo-Abhikhu kanye labadala bako-Israyeli abangamatshumi ayisikhombisa bakhwela 10 bayabona uNkulunkulu ka-Israyeli. Ngaphansi kwezinyawo zakhe kwakungani ngumbundu owenziwe ngesafaya, kukhanya njengokukhanya komkhathi uqobo.

11 Kodwa uNkulunkulu kazange abanine ngesandla sakhe laba bakhokheli bako-Israyeli; sebembonile uNkulunkulu badla banatha.

12 UJehova wathi kuMosi, “Khwela uze kimi entabeni njalo uhlale lapha, ngizakunika izibhebhedu zamatshe, engilobe kuzo imithetho lemilayo eyiziqondiso zabo.”

13 Ngakho uMosi wasuka loJoshuwa umsizi wakhe, uMosi wasekhwela entabeni kaNkulunkulu.

14 Wathi ebadaleni, “Silindeleni khonapha size siphenduke. U-Aroni loHuri bazasala lani, kuzakuthi abaphikisanayo babonane labo.”

15 Kwathi uMosi esekhwele intaba, yasitshekelwa liyezi, 16 inkazimulo kaJehova yagcwala entabeni yaseSinayi. Iyezi lembesa intaba okwezinsuku eziyisithupha kwathi ngosuku lwesikhombisa uJehova wabiza uMosi eseyezini. 17 Ebantwini bako-Israyeli inkazimulo kaJehova yabonakala injengomlilo ohangulayo phezu kwentaba. 18 Ngakho uMosi wangena eyezini ekhwela intaba. Wahlala khonale entabeni okwezinsuku ezingamatshumi amane lobusuku obungamatshumi amane.